ဘက်ဆဲလား စာရေးဆရာမ ပုညခင်ရဲ့ အိမ်ဦးနတ်

ဆရာမပုညခင်ရဲ့ အမျိုးသားဖြစ်တဲ့ ကိုသူရကျော်ကို အင်တာဗျူး လုပ်ဖို့စီစဉ်ထားတာ ကြာပါပြီ။ ဒါပေမဲ့ အကြောင်း အမျိုးမျိုးကြောင့် မေးခွင့် မသာခဲ့ပါဘူး။ တစ်ရက်မှာတော့ ဆရာမပုညခင်တို့ လင်မယား ပုဂံကနေ ပြန်ရောက်နေပြီလို့ မမယ်သုန်က ပြောတဲ့အတွက် ဆရာမ ပုညခင်တို့ အားတဲ့အချိန်ကို ဆက်သွယ်ပြီး မမယ်သုန်နဲ့ အတူ ဆရာမတို့ အိမ်ကို ရောက်ခဲ့ပါတယ်။ အမြဲအေးချမ်းနေတဲ့ ဆရာမတို့စုံတွဲက ပြုံးပြုံးရွှင်ရွှင်နဲ့ စောင့်ကြိုနေပါတယ်။ ကိုသူရကျော်က ''ဘာတွေမေးမှာ လဲမသိဘူး။ သိပ်တော့ မဖြေတတ်ဘူး''လို့ပြောတဲ့အခါ ဆရာမပုညခင်က ''အစ်မတို့က စိတ်ထဲမှာ သေးသေးလေး ခံစားရရင်တောင် အကြီးကြီး ပြောတတ်တယ်။ သူက အကြီးကြီး ခံစားရရင်တောင်မှ သေးသေးလေးပဲ ပြောတတ်တာ''လို့ ဘေးကနေ ပြောပြပါတယ်။

ကိုသူရကျော်က ဆရာမနဲ့စတွေ့ခဲ့ပုံကို အခုလိုပဲ ပြောပြခဲ့ပါတယ်။

''သူ့ကိုစတွေ့တာက သူပုဂံမှာ စာလာရေးတုန်းက စတွေ့တာပါ။ တွေ့ကတည်းက စာရေးဆရာမပုညခင် အနေနဲ့ သိခဲ့တာပါ''

ဆရာမက ပုဂံမှာ စာလာရေးရင်း တွေ့တာဆိုတော့ သူတို့နှစ်ယောက်က ပုဂံဖူးစာလို့ ဆိုရမလိုပါပဲ။ ဆက်လက်ပြီး ကိုသူရကျော်က လက်ထပ်ဖို့ ညှိနှိုင်းခဲ့ရပုံကိုလည်း။

''လက်ထပ်ဖို့အတွက် တစ်နှစ်လောက် ညှိနှိုင်းခဲ့ရပါတယ်။ တစ်နှစ် အတွင်းမှာ သူ့စိတ်က အမျိုးမျိုး ပြောင်းနေတာကို စိတ်ရှည်ရှည်ထားပြီး စောင့်ခဲ့ရပါတယ်။ သူက လက်ထပ်မယ် ပြောလိုက်၊ အပျိုကြီးလုပ်တော့မယ် ပြောလိုက်နဲ့ အချိန်တွေ အများကြီး တွေဝေနေခဲ့တာပါ။ ချင့်ချိန်တာတွေ၊ ရှေ့ရေး တွေတွေးပြီး ကြောင့်ကျတာတွေလည်း များတယ်။ ကျွန်တော်တို့ မင်္ဂလာဆောင်ဖို့ Hotel Date ပထမတစ်ခါ လုပ်တယ်။ သူ့စိတ်က သိပ်မပြတ်သားသေးတာနဲ့ တစ်လ နောက်ဆုတ်ပြီး Hotel Date ပြန်ယူပြီးမှ လက်ထပ်ဖြစ်ခဲ့ကြတာပါ'' ဆိုပြီး ပြောပြခဲ့ပါတယ်။ ဆက်လက်ပြီး

''သူ့ကို နားလည်ပေးရတာတော့ တော်တော်များပါတယ်။ သူက ခံစားလွယ်တယ်။ အနုပညာသမားမို့ စိတ်နုတာပဲလားတော့ မသိဘူးဗျ။ သူစာရေးရင်း ပင်ပန်းတဲ့ အချိန်တွေမှာ Stress များလာရင် အနားကလူကိုပဲ ဂျီကျတတ်ပါတယ်။ အဲဒီအခါကျတော့ သြော် ...သူ့မှာ Stress များနေလို့ပဲလေ ဆိုပြီး သူ့ကို ခွင့်လွှတ် နားလည်မှုမျိုးလေးတွေ ပေးရပါတယ်''လို့ ပြောပြခဲ့ပါတယ်။

ပုဂံမှာ လုပ်ငန်းတွေရှိတယ်လို့ သိရတဲ့ ကိုသူရကျော်ဟာ စာအုပ်ထုတ်ဝေသူ အနေနဲ့ လုပ်ကိုင်တယ်လို့ သိရတဲ့အတွက် စာပေ လောကထဲကို ခြေစုံပစ် ဝင်တော့မှာလားလို့ မေးဖြစ်တဲ့အခါ -

''သူနဲ့ကျွန်တော် အိမ်ထောင်ပြုဖို့ ဆုံးဖြတ်ကြတဲ့အချိန်မှာ သူက ကျွန်တော့်ကို ကတိတစ်ခုပဲ တောင်းဆိုတယ်။ အဲဒါက ဘယ်လို အခြေအနေပဲရောက်ရောက် မိသားစုနဲ့ခွဲခွာပြီး လုပ်ရတဲ့ အလုပ်မျိုးမလုပ်ဖို့ပါ။ သူက ငယ်ငယ်ကတည်းက သူ့မိသားစုနဲ့ ခွဲခွာပြီး ရန်ကုန်မှာ တစ်ယောက်တည်း လာနေရတယ်။ အဆောင်မှာနေပြီး တစ်ယောက်တည်း အထီးကျန်ပြီး ရုန်းကန်ခဲ့ရတဲ့ အချိန်တွေကို ပြောပြတယ်လေ။ အဲဒီတော့ သူ့စိတ်ချမ်းသာမှုကို ဦးစားပေးပြီး ကျွန်တော့် အလုပ်တွေကို ထားခဲ့ရပါတယ်။ အခုလောလောဆယ်တော့ သူ့စာအုပ်ကိစ္စတွေကို လုပ်ပေးနေတာပါ။ ဒီလောကထဲကို ခြေစုံပစ်ဝင်ဖို့ မဆုံးဖြတ်ရ သေးပါဘူး'' လို့ဖြေကြားပေးခဲ့ပါတယ်။

ဆရာမ စာရေးတဲ့အခါ အကြံဥာဏ် ပေးဖြစ်ပုံနဲ့ အမှတ်တရရှိခဲ့တဲ့ အဖြစ်အပျက်လေးတွေ ကိုလည်း ပြောပြခဲ့ပါသေးတယ်။

''သူက ဝတ္ထုရေးတာနီးရင် သူရေးမယ့် ဇာတ်လမ်းတွေ အကြောင်းပြောပြပြီး တိုင်ပင် အကြံတောင်းတတ်ပါတယ်။ တစ်ခါတစ်လေ ဇာတ်ကောင်နာမည် ကူစဉ်းစားပေးဖို့ ပြောတတ်တယ်။ ဒါပေမဲ့ စဉ်းစားမိတဲ့နေရာ ပြောရင်လည်း နာမည်က တုံးတုံးကြီးလို့ ပြောပါတယ်။ တစ်ခါမှလည်း ထည့်မသုံးပါဘူး။ သူအကြံဥာဏ်တောင်းတဲ့အခါ တတ်သလောက်၊ မှတ်သလောက်ကလေးတွေတော့ အကြံဥာဏ်ပေးဖြစ်ပါတယ်။ သူနဲ့ကြားမှာ အမှတ်တရလေးတွေ ကတော့ အများကြီးပါပဲ။ တချို့ဟာလေးတွေပဲ ပြောပြမယ်နော်။ သူ ပုဂံကိုလာတုန်းက ဧရာဝတီမြစ်လယ် သောင်ပြင်ပေါ်က တံငါတဲလေးတွေကို သွားကြည့်ချင်တယ် ဆိုလို့ စက်လှေငှားပြီး လိုက်ပို့ပေးဖူးတယ်။ အဲဒီ တံငါသည်တွေရဲ့ ဘဝကို သူလိုက်မေးပြီး စပ်စုနေတာကို ဘေးနားကနေပြီး ဓာတ်ပုံ မှတ်တမ်း လိုက်တင် ပေးနေခဲ့တယ်။ အဲဒါလေးက အမှတ်တရပဲ။ အဲ ...နောက်ပြီး သူ့နာမည်က ပုညခင် ဆိုတော့ ဆိုင်မဆိုင်တော့ မသိဘူးပေါ့ဗျာ။ စလေဦးပုည ဇာတိ စလေက ရုပ်စုံကျောင်းကို သူလေ့လာလို့ ရအောင် လိုက်ပို့ပေးဖူးတယ်''

ပြီးတဲ့အခါမှာတော့ ဆရာမအပေါ်ထားတဲ့ ကိုသူရကျော်ရဲ့ သဘောထားနဲ့ ဆရာမနဲ့ လက်ထပ်ခွင့်ရတဲ့ အတွက် သူ့ရဲ့ ခံစားချက်တွေကိုလည်း အခုလိုပဲ ပြောပြခဲ့ပါတယ်။


''ကျွန်တော့်အနေနဲ့ အတတ်နိုင်ဆုံး သူစိတ်ချမ်းသာအောင် ဖြည့်ဆည်းပေးချင်ပါတယ်။ ဒါက အိမ်ထောင်ရှင်တိုင်း ဖြေမယ့်စကားလေးပါပဲ။ 'နားလည်မှု'ပါ။ တစ်ယောက်နဲ့တစ်ယောက် ချစ်ပေမယ့် နားလည်မှုမရှိရင် အိမ်ထောင်ရေးဟာ သာယာတဲ့ အိမ်ထောင်တစ်ခု ဖြစ်လာမှာ မဟုတ်ပါဘူး။ ကျွန်တော်ကတော့ ကိုယ်ချစ်တဲ့သူနဲ့ လက်ထပ်ခွင့်ရတာပဲဗျာ။ ချစ်တဲ့သူနဲ့ လက်ထပ်ခွင့်ရတဲ့ သူတိုင်း ပျော်ကြပါတယ်။ ကျွန်တော်က ပိုပျော်မယ် ထင်ပါတယ်။ ဘာဖြစ်လို့လဲဆိုတော့ သူ့ကို လက်ထပ်ခွင့်ရလို့ပေါ့ဗျာ''

ဒီလိုနဲ့ပဲ ကျွန်မတို့ရဲ့ အင်တာဗျူးကို အဆုံးသတ်ခဲ့ပါတယ်။ တစ်ယောက်နဲ့ တစ်ယောက် ချစ်ခင်မှု၊ နားလည်မှုတွေနဲ့ တည်ဆောက်ထားတဲ့ ကိုသူရကျော်နဲ့ စာရေးဆရာမပုညခင်တို့ရဲ့ အိမ်ထောင်ရေးဟာ အေးချမ်းပြီး သာယာမှုတွေနဲ့ ပြည့်နေပါတယ်။ ဆရာမတို့စုံတွဲကို နှုတ်ဆက်ပြီး ပြန်လာတော့ အပြင်မှာ မိုးဖွဲဖွဲလေးတွေ ရွာနေတာမို့ ဒါလည်း အေးချမ်းတဲ့ နိမိတ်ပဲလားလို့ မဆီမဆိုင် တွေးမိခဲ့ပါတယ်။ ဒီလိုမျိုးအင်တာဗျူးလေးတွေ လုပ်ဖြစ်အောင် Guide Line ချပေးတဲ့ ကျွန်မတို့ရဲ့ဆရာ၊ အချိန်ပေးပြီး ဖြေကြားပေးတဲ့ ကိုသူရကျော်နဲ့ ဆရာမပုညခင်၊ အလုပ်မအားတဲ့ကြားက အချိန်လုပြီး လိုက်ပို့ပေးတဲ့ အစ်မမမယ်သုန်နဲ့ ကျေးဇူးတင်ထိုက်သူများ အားလုံးကို ကျေးဇူးတင်ပါတယ်လို့။
ရတနာဦးလှိုင